Nira sā toki tani mai na nodra dui koronivalu makawa na kai Suva, ra sa qai lai vakoro ena vanua sa banikovana tiko edaidai. Na baravi ena vanua nei Misi Rimisinaida, e yacana o Nasese. E vakatokayacataki ena kena dau sē kina na ua. E rua na gaunisala erau gole mai Vatuwaqa ina koro makawa o Suva, rau muria ruarua mai na gaunisala na Rewa. E dua vei rau e takosova na lomanibai nei Misi Sikote o Nadrewa, ina gaunisala sara na Cakobau. E tu na yaca ni veivanua kece qo. Na vanua e toka kina na nodra vale na isoqosoqo na Mason e Suva e yacana o Voronamataka. Na vanua e toka kina na valenilotu Jaji o Vutuyaloyalo. E qai lai gole sara na gaunisala ina yasa ni delana sa mai talaraki volekata na koronivuli na Qarama. A yaca ni vanua qo o Qaranimokukau, a ibulubulu tu. O Ucuibau, nodra ikelekele na waqa ni Bau, e koto ni sivi na gusu ni wailailai e drodro yani i rārālevu. Na vanua e tara toka kina na otela na Pasivika e yacana o Vunivesi, dau nodra ikelekele ni waqa na tauvanua. Na baravi e daku ni otela e yacana o Vunimulomulo. Ena muaicake ni koro makawa na sala e kosova koto na gaunisala na Cakobau. Na yaca ni vanua oqo o Naisobubenu, baleta ni dau bini kina na benu. Ena lomadonu ni rārālevu a koto kina na tobu, sa bulu nikua, a dau nodra isasavui na yalewa era lesu mai na iteitei nira vakarau curuma na koro. E tai, o Matameiwali, nodra itakitaki ni wainigunu, lai cabe ina delana o Vuniivi, ena vanua erau sota kina na gaunisala na Mijieli kei na Mekareka, me gole mai kei ina rārā na Vikatoria ina itātākoso sara mai Naisamuni. Me vaka sa tukuni oti, a toka na koro o Suva ena vanua sa Banikovana edaidai. Ra sa qai toki na lewei Suva i Narikoso ena tai ni toba ena yabaki 1882, koya sa o Suvavou nikua. Na vanua volekata na vale ni kaloko e dau kedra ibulubulu na kai Suva. Na yaca ni nodra itikotiko na cakacaka e valenivei-vesu nikua o Soso. Ni toso tiko na gauna, sa mai volekata sara na gaunisala e baravi na kubu ni vale ni turaga Tui Suva o Ratu Avorosa. Qo me volekata na vei¬mama ni sala na Cakobau kei na matamata i Valelevu. Ia na vale nei tamana o Ro Ravulo, o koya a tauyavutaka na koro, e toka yani i loma ena ceva, volekata toka na vale nei Lacalevu na betelevu. Erau bulu vata koto kei na watina o Wasi Rokovaka¬tini e yasa ni burekalou.
