Vakataraisulu vua na Roko Tui Bau : Ratu Joni Madraiwiwi
Vakataraisulu vua na Roko Tui Bau: Ratu Joni Madraiwiwi 12-14/01/2017.
E ciri koto na Yanuyanu o Bau ena Delaniwaisiliva. E volai ena ivola tukutuku ni vanua maroroi ena Tabana ni Veitarogivanua ni vakayacani taumada na Yanuyanu qo me o Korolevu, sa qai mai kilai tiko ena gauna qo me o Bau. E tiko kina e tolu na koro, na koro o Bau ena kena Yavusa o Kubuna kei Mataisau; na koro o Lasakau kei na kena Yavusa o Nabou kei na koro o Soso ena Yavusa o Tunidau. E liutaki ira tiko vakavanua na Turaga Vunivalu ena Yavusa Tui Kaba kei na Sauturaga na Roko Tui Bau na kai Vusaratu. E tukuni nira tawana taumada na vanua o Kubuna ni bera nira toki i Yanuyanu, gauna vata qori era a tawana na Gonedau o ira na kai Butoni kei ira na kai Levuka ni bera nira vakatalai ena vuku ni lewa vakavanua. Ena ivola nei Deve Toganivalu “The island of Bau and the people of Kubuna” e talanoataki kina na itukutuku kei Vueti na imatai ni Roko Tui Bau ni vanua o Kubuna. A vakamacalataki kina na nona rawata o Vueti na koroi ni valu, na Roko Tui Bau kei Koroiratu mai Bulu ni oti mai e dua na i valu mai Nakauvadrau. Nona lesu i vanua era a siro sobu e dua na i wase ni nona mataivalu mera vakaitikotiko e Nakorotubu; ia, o Vueti a muria sobu mai na Wainibuka ra mai cegu i Nayavu ra vakatoka me o Nayavuturaga, e tiko kina na nona kawa me yacova mai nikua.
